Arqueoloxía técnica e
xestión integral do patrimonio cultural
EQUITE - Arqueoloxía Técnica  e Xestión Integral do Patrimonio Cultural

Últimas novas

31

Feliz Aninovo

Neste ano tan atípico e hostil que por fin nos deixa, en EQUITE non deixamos de traballar, coas dificultades imposibles de evitar que todos coñecemos, pero sen baixar o espírito. Afortunadamente, mantívose o volume e o ritmo dos proxectos e incluso hai que dicir que aumentou, polo que polo menos cremos que podemos ser optimistas para o futuro.

Queremos aproveitar os últimos momentos deste 2020 para desexar unhas felices festas e esperamos que o ano que vén sexa mellor para todos que o que se vai. E para iso escollemos este ano unha imaxe invernal da praza de Amboage cuberta de neve que se remonta a principios do século pasado.

Esta praza está situada no cerne do barrio ferrolán da Madalena, declarado BIC como conxunto histórico-artístico en 1984.

Na parte dereita da imaxe destaca a agora ruinosa igrexa parroquial de Nosa Señora de Dolores. O proxecto deste edificio sería obra do enxeñeiro Julio Sánchez Bort, pero finalmente e debido aos compromisos do distinguido mestre, caeu en mans do seu menos cualificado axudante, o arquitecto Antonio de Bada e Navajas en 1771. Este feito fortuito foi decisivo para o destino do edificio, que nunca se rematou ben, o que, xunto coas desafortunadas restauracións levadas a cabo ao longo do século XX, provocaron o seu actual estado de conservación, tan pobre como preocupante pois nestes intres a estabilidade estrutural da propia construción está comprometida.

Co novo ano 2021 comezará un plan de recuperación e rehabilitación moi necesario e completo para este edificio, patrocinado pola Conselleríade Cultura da Xunta de Galicia e no que EQUITE colaborará na parte de arqueoloxía.

Decembro
24

Bo Nadal

Este foi un bo ano en EQUITE, con niveles de traballo inéditos para nós tanto en número de proxectos como de clientes.

Un deles, aínda en execución, foi o seguemento arqueolóxico das obras do colector de saneamento dos asteleiros de NAVANTIA, na cidade de Ferrol, e que incluían elementos do Patrimonio Cultural vencellado ó Camiño Inglés de Santiago e máis o Barrio da Madalena, un conxunto histórico declarado dende o ano 1984.

Entre eses elementos consta a denominada Porta antiga do Asteleiro, datada en 1857, que vemos na imaxe adxunta. Nesta ocasión a porta, totalmente iluminada, compuña unha inusual estampa de nadal fai case que un século, cando a debandita estrutura, hoxe clausurada, contaba cunha vida y atafego que agora xa só forma parte da lembranza e a Historia da cidade.

Ofrecemos pois esta imaxe como a nosa felicitación nadaleña para estas festas cos nosos mellores desexos.

Decembro
10

Escavacións de verán

Un ano máis tentamos achegar ós estudantes e voluntarios información sobre posibles escavacións arqueolóxicas que aceptan a colaboración de persoal externo. Este tipo de actuacións resultan especialmente interesantes para aqueles que aínda se atopan en período de formación, ou que desexan complementar esta coa sempre imprescindible experiencia práctica.
Neste caso facémonos eco da Campaña de escavación arqueolóxica organizada pola Universitat de Barcelona en Revenga (Comunero de Revenga, Burgos) baixo a dirección das doutoras Karen Álvaro y Esther Travé, e que terá lugar entre os días 29 de xullo e 11 de agosto deste ano.
O prazo de inscrición pechábase o pasado 10 de xuño mais ven de ampliarse ata o vindeiro día 14, polo que os interesados aínda están a tempo.
Pode descargarse o formulario de inscrición na seguinte ligazón
http://www.grampub.com/ub/images/pdf/RE2019-Inscripcion.pdf
E para máis información sobre esta actuación pódese acudir a estoutra ligazón.
http://www.grampub.com/ub/index.php/es/home-grampub/item/abierto-el-plazo-de-preinscripcion-en-las-campana-de-excavacion-arqueologica-en-revenga-comunero-de-revenga-burgos?fbclid=IwAR3MFhaplupEVPOiN1YhmDFvlQu96_7ntYNecm_DmZy4qpxfvqwS-H368yU

Xuño